Arangkada of Leo Lastimosa for March 2, 2008

       SI ANNA

 

       Si Anna nahimutang sud sa ngitngit nga lawak dihang natultolan sa kapolisan.  Gikadenahan ang iyang usa ka tiil sa tinak-opan nga lawak.  Binlan lang siya og pagkaon, ug paubanan sa ilang binuhi nga iro, kon manglakaw ang iyang mga ginikanan.

        Ang ilang mga silingan, nga nahibung sa lihok sa iyang mga ginikanan, maoy nisumbong sa mga polis.  Pag-abli sa mga polis sa pulthan sa lawak, naglisod sila pagtuo sa ilang nakita:  Onse anyos nga batang babaye nga nagkabulingit ang dagway nga nagsul-ob sa hapit na madugta nga sinina tungod sa katuigan sa pagpabaya.

        Daot si Anna.  Mas gamay pa gyod ang iyang bitiis nga gigakotan sa kadena.  Kay gitanggong siya dihang upat ka tuig pa lang ang panuigon.

        Sakit sa mga mata ni Anna ang kahayag nga nipuli sa ataon nga kangitngit nga maoy iyang namat-an ug nakatulgan sud sa pito ka tuig.  Nahadlok siya dihang giduol sa mga polis.  Mas nalisang dihang gilibotan sa nakuryuso nilang mga silingan.  Way makabasol niya.  Wa siyay laing kauban gawas sa iro.

        Dihang gihiling sa mga mananambal, ilang nakaplagan ang mas dakong kadaot nga nahiagoman ni Anna.  Tungod sa pito ka tuig niyang pagkatanggong sa tinak-opang lawak, nga way bisan usa nga nakighinabi niya, di na siyang kalitok og bisan usa na lang ka pung.  Nakalimot na siya unsaon pagsulti.

        Gisud si Anna sa Psychiatric Ward sa Vicente Sotto Memorial Medical Center.  Ang mga doktor ug nurses naluoy sa iyang kahimtang.  Nagpulipuli sila pagda og mga duwaan.  Bisan giunsa na lang nila siya paghagwa.  Apan nagpabilin siyang tak-om.

        Hangtod nga usa ka adlaw, nagkaguliyang ang ward.  Si Anna maoy hinungdan.  Ang tanang nahibawo sa hinungdan sa kaguliyang nangalipay.  May sukaranan ang ilang pagsaulog.

        Si Anna nakalitok na og usa ka pung:  "Pansit."

        Mao toy sinugdanan sa pagkahibalik sa katakos ni Anna pagsulti.  Nahibawo nang mga doktor ug nurses unsay igasa niya.  Inay balloons ug ubang duwaan, gibahaan siya og pansit.  Nga mao diay intawon ang iyang kinaham nga pagkaon sa wa pa kadenahi ug tanggonga sa iyang mga ginikanan.

        Nahitabo ni niadtong 1982.  Si Anna, kon buhi pa, 37 anyos na karon.

-o0o-

        Nahadlok ko nga ang kinabag-an sa atong katawhan nahisama ni Anna.  Gikadenahan sila sa kakabos ug gitanggong sa kaburong sud na sa daghang katuigan.  Nga kon suwayan nimo pagtukas ang kangitngit nga nagsalimbong nila suwawan lang hinuon ug mangahadlok.

        Alang nako, mao ni labing dakong hagit sa tanang nagpakabana nga mga hut-ong sa katilingban.  Ang pagtabang sa katawhan pagkaplag pagbalik sa ilang tingog.  Mahimong, sama ni Anna, pansit ang una nilang malitok.

        Apan sa kapulihay mamalikas ug maningil na sila pagbawi sa gahom nga gihikaw nila sa dugay nang panahon.  [30]  leo_lastimosa@abs-cbn.com

Arangkada of Leo Lastimosa for March 1, 2008

        TINGOG SA KATAWHAN

 

        Ang labing sakit nga paniid sa nangaging mga people power mao nga di ang masa maoy nagpasiugda nila.  Nga ang katawhan wa makamata usa ka buntag niadtong Pebrero 1986 ug nakahukom pagpalagpot ni Ferdinand Marcos.  Ug labaw nang wa sila mapugwat niadtong Enero 2001 ug nagkauyon pagpalayas ni Joseph Estrada gikan sa Malakanyang.

          Gipasanginlan ang katawhan nga igo lang nagsunud-sunod unsay sulti sa ilang mga lider.  Nga gawas nga may katakos pagpalihok sa nagkalainlaing hut-ong sa katilingban, apil nang militar ug simbahan, makahimo sab pagtapok sa katawhan paghimong lehitimo sa ilang tinguha, alang man sa nasud o personal lang nga kabulahanan,  pag-ilog sa gahom.

                   -o0o-

          Samtang tinuod nga di mahimong planuhon ang usa ka rebolusyon, malinawon man nga people power o duguon nga pag-alsa sa armas, subo gihapon nga palandungon ang kagamay sa papel sa kinabag-an sa katawhan.  Igo lang silang modason sa ilang mga pangu.  Mora lang silag tigtiwas.  Bisan kon kasagaran sa mga nagduslit sa pabilo wa magtinguha sa ilang kaayuhan.

          Tungod ba ni sa kakuwang nilag pagpakabana?  Nga nagumikan sa kakuwang nilag kasayuran?  Nga nagumikan sa kakuwang nilag edukasyon?  Nga nagumikan sa labihan nilang katimawa? 

          Nga nagumikan sa pangurakot sa mga tagduma sa kagamhanan?  Nga nanukad sa ilang pagpabaya?  Nga nanukad sa makalilisang nga gasto sa ilang pagpapili sa katungdanan?  Nga nanukad sa sayop nga pagpili sa katawhan?  Nga nagumikan sa kakuwang nilag pagpakabana, sa kakuwang nilag kasayuran, sa kakuwang nilag edukasyon ug sa labihan nilang katimawa?

                   -o0o-

          Kanus-a man magsugod pagtingog ang katawhan?  Aron nga ang mga tagduma sa kagamhanan maminaw na nila?  Kanus-a man ang katawhan mopahamtang sa ilang kabubut-on?  Aron nga ang ilang pagbuot mao nay matuman?

          Hangtod nga ang katawhan di manginlabot pag-umol sa ilang kaugmaon, kay na-upos ang tibuok nilang panahon paghaw-as sa ilang kaugalingon gikan sa pagkalumos sa mangtas nga kalaworan sa kagutom ug kakabos, way kausaban nga mahitabo.  Magpuli-puli lang paghakgom nila ang madag-umon nga banagbanag sa pagpahimus ug ataon nga kilum-kilom sa panaugdaog.

                   -o0o-

          Maong magduda na ta sa mga mangangkon nga maoy nagda sa tingog sa katawhan.  Isalikway na nato si bisan kinsa, ma-politiko, ma-pari, o ma-magsisibya man, nga mangangkong maoy tigpamaba sa katawhan.  Hinunoa, magsugod na tag paminaw sa tinuoray nga tingog sa kinabag-an.

          Mahimong sa sinugdanan yabag ug yagaw nga hagubhob ang atong madunggan.  Apan kasarangan lang nga di dayon masabtan ang tiyabaw sa mga tawo nga wa patingoga ni paminawa sa dugay nang panahon.  Kon makabuylo na sa pagsulti ug makaplagan nag balik ang ilang tingog, ang katawhan di na mosugot nga isalikway ug lingug-lingogan lang.  [30]  leo_lastimosa@abs-cbn.com

Arangkada of Leo Lastimosa for February 29, 2008

      LUSOT SA BUSLOT

     Samtang wa pay makatino kon ang imbestigasyon sa Senado sa kontrobersiya sa NBN mosangpot ba sa pagkiha ug pagbilanggo sa mga utok sa transaksiyon, gipanghinaot nga ang mga senador makatuman sa ilang tahas pagpanday og bag-ong mga balaod o pag-usab sa nalutsan nga mga lagda.

      Ang balaod nga naghilak sa kausaban mao ang Government Procurement Act. Nga human gipasigarbo nga makapatigbabaw sa kaligdong sa mga transaksiyon sa kagamhanan nabisto nga labihang dakoag buslot, labihang lubaya ug labihang huyanga nga dali rang nalutsan, nalubag ug nayatakan.

      Sa desperadong paningkamot pagpabilin ni Pres. Arroyo sa Malakanyang, iyang mga turutot nangugat na lang nga ang pag-usab sa balaod mas mahinungdanon kay sa pagsusi may labot ba si Arroyo sa $329 milyones nga eskandalo.

           -o0o-

      Si Rodolfo Noel Lozada Jr. nihulagway sa procurement system sa kagamhanan nga "dysfunctional." Nidason sa iyang baruganan ang gipasangil nga mga panglaktod ug palusot. Di lang sa NBN. Kon dili hasta na sa CICC ug sa mga proyekto sa 12^th Asean Summit sa Sugbo.

      Gisubay ni Lozada ang labing dakong kahuyangan sa procurement system: Gubot ug komplikado kaayong mga lagda nga pipila lang ka mga opisyal sa kagamhanan ang nasuhito ug ang pribadong sektor way bisan gamayng ideya unsaon pag-apil sa salida. Mao ni nga bisag giunsa nag paburot ang presyo way taga gawas nga makabantay kay ang mga tigpasiugda makatampok man gihapon sa ilang dughan pagpangangkon nga nasubay ang tanang lagda ug natuman ang tanang panginahanglan.

           -o0o-

      Maong ang nakabisto sa kahiwian sa NBN mao ra silang Lozada ug, kon katuohan siya, si Dante Madriaga. Kay silay naghikay sa transaksiyon gikan sa sud. Sila ray nakasaksi sa tanang maniobra nga di mahitabong malilian sa mga magbubuhis bisag unsaon pa nila pagpanginlabot ug pagpakabana.

      Mao sab ni hinungdan nga si Crisologo Saavedra ray nakabisto sa anomaliya sa surveillance cameras sa summit. Kay apil man siya, ug nakadaog man gani, sa subasta. Ang iyang kasuhito sa mga lagda, tungod sa taas niyang kasinatian sa patigayon, maoy nakagiya niya paghukas sa overpricing sa decorative lampposts. Ug pagpasangil nga gilaktod ug gibuak-buak ang mga kontrata sa CICC.

           -o0o-

      Ang gikuwestiyon ug wa pa mausab nga procurement act may mga sugo nga klarong nalapas. Sama sa probisyon nga kinahanglang ipakita kon pangayuon sa mga magbubuhis ang mga dokumento sa subasta. Wa ni tumana nilang Gobernador Gwen Garcia ug ubang mga tagduma sa CICC.

      Kinsay mobaraw sa ilang kalapasan? Ang Visayas Ombudsman kurog ni Garcia. Ang COA wa magdali. Ang nagpakabanang mga magbubuhis gipakauwawan. Ang mga sakop sa media nga nangahas pagkuwestiyon sa transaksiyon gipanggukod. Ug ang piskaliya ug mga hukmanan di hingpit nga gawasnon gikan sa kuko sa gamhanang mga politiko. [30] leo_lastimosa@abs-cbn.com

Arangkada of Leo Lastimosa for February 28, 2008

      TIKDOL NI PUNO

     The Peninsula, Makati City ---- Nia ko magsuwat ini sa nabantog nga lobby ning luhong hotel nga nahimong sentro sa labing uwahing pagsuway ni Senador Antonio Trillanes IV pagpakanaog ni Pres. Arroyo sa katungdanan. Lapad kaayo ang lobby maong wa maglisod ang kapolisan pagpasud sa ilang tangkeng igugubat dinhi aron pagbaraw sa mubo nga rebelyon. Segun sa mga kawani mahimong kasudlan og hangtod napu ka tangke ang dako nilang lobby.

      Gibuksan dinhi gahapon sa buntag ang tulo ka adlaw nga kalibotanong tigom mahitungod sa "Impunity and Press Freedom." Ang unang namulong mao si Chief Justice Reynato Puno. Kansang gipasiugdahang tigom batok sa extra-judicial killings sa niaging tuig maoy usa sa gipasikaran ning nagpadayong kalihokan. Nakatag-an mo, wa kalikay si Puno paghisgot sa politikanhong kontrobersiya karon sa nasud.

           -o0o-

      Gituki ni Puno ang taas nga kasaysayan sa pagpanlugpit sa kamatuoran. Gitataw niya nga ang tanang bangis nga pagpamatay, pagdagmal ug pagpanggukod nga nahiagoman sa mga nagsulti sa kamatuoran wa makaluba sa kagawasan sa pagpadayag. Nipasidaan siya nga ang mga pagsuway paglugpit sa kagawasan di gyod matapos. Maong giawhag niya ang media ug mga hukmanan nga di kapoyan ni molunga sa pagpanalipod sa kagawasan.

      Nisugyot si Puno nga palambuon ang mithi sa makanunayon nga pagpangita sa kamatuoran. Gitataw niya nga ang kagawasan sa pagpadayag maoy labing mahinungdanong panginahanglan sa pagbugtaw sa kamatuoran. Kay, niya pa, makab-ot lang ang kamatuoran kon mopatigbabaw kini bisan sa paghagit ug pagbangga sa sukwahi nga mga kasayuran.

      Ang tema sa pakigpung ni Puno mao ang mga hulga sa media ug demokrasya. Apan ang kinatibuk-ang pakigpung naputos sa mga pasumbingay mahitungod sa krisis nga nitay-og karon sa pamunoang Arroyo.

           -o0o-

      Unang klaro niyang sulti mahitungod sa krisis: Ang katungod sa kamatuoran maoy sukaranan sa "rule of law." Ambot naatol ba lang o gituyo gyod niya pagsukwahi ang gibalikbalik nga awhag ni Pres. Arroyo pagsunod, pagtahud ug pagpatigbabaw sa rule of law.

     Wa sab siyang kapugong paghulagway sa mga pagsuway pagpahilom sa kamatuoran nga "evil." Nga usa sa mabulukong mga paghulagway nga naangkon ni Arroyo karong bag-o.

            -o0o-

      Labing klarong tikdol ni Puno sa krisis mao ang pagtapos sa iyang pakigpung pinaagi sa pag-awhag nga ipatigbabaw ang speech (katungod sa pagpadayag) ug speech+ (ang pagpahamtang sa kagustohan sa katawhan). Ambot naatol ba lang o tinuyo gyod nga ang speech+ iyang giluwatan usa ka adlaw human ihulagway ni Dante Madriaga, ang labing uwahing saksi sa Senado, ang pundok nga nakapahimus sa NBN-ZTE scandal, nga giingong gipangulohan ni Pres. Arroyo ug sa iyang bana, nga "Greedy Group++.

       Makabungog ang pakpak sa mga nanambong dihang niingon si Puno nga ang "speech" ug "speech+" maoy mohatod nato ngadto sa ganghaan sa kamatuoran. [30] leo_lastimosa@abs-cbn.com

Arangkada of Leo Lastimosa for February 27, 2008

      TRABAHO SA CANADA

     Padayong nagbaha ang emails ug mga tawag sa telepono nga among nadawat nga nagpakisayod sa daghang kahigayonan sa panrabaho sa Canada,  Kasagaran nila naghinam-hinam na kanus-a makasugod ang recruitment sa Sugbo. Kinsa man tinuod ang di madani sa gisaad nga 54,000 ka mga trabaho sa British Columbia karong tuiga? Ug sa 1.9 milyones ka trabaho sa tibuok Canada sa mosunod nga napu ka tuig?

      Amo silang gitubag nga hapit na.  Kay gihingpit pa lang sa Canada ug Pilipinas ang mga pangandam sa paglalin sa kaliboan ka Pinoy nga mga trabahante ngadto sa upat ka mga lalawigan sa kasadpang Canada nga nagkuwang pag-ayo og mga mamumuo.

                -o0o-

     Apan ang among kamalaumon nahugno dihang nakighinabi mi sa kadagkoan sa Dole ug POEA.  Si Dole 7 Director Elias Cayanong nipasabot nga di sayon ang pagda dinhi sa Sugbo sa placement agencies nga may aprobadong job orders alang sa Canada.

     Si POEA Visayas Director Evelia Durato mas prangka. Matod niya hangtod nga may mga aplikante pang makapasar sa mga panginahanglan sa Canada di makahunahuna ang 109 ka placement agencies nga pulos tua magbase sa Metro Manila pag-anhi sa Sugbo.  Kay dako ang ilang gasto sa ayroplano, hotel, pagkaon ug ubang panginahanglan kon dad-on ang ilang recruiters gawas sa Manila.

     Ang daotang balita mao nga wa magnihit ang mga aplikante gikan sa Metro Manila ug kasilinganang mga lalawigan sa Luzon.

          -o0o

      Di hinuon ta angayng mawad-an og paglaom.  May kahigayonan pa nga gawas nga manganhi ang placement agencies mahimong mapahigayon pa gyod sa Sugbo ang job fair alang sa Canada ug ubang kanasuran sa kalibotan.

     Mao ni ang gipaningkamotan karon nilang Fidel Magno sa DMDP, kinsa uban ni Cebu City Vice Mayor Michael Rama maoy nagpasiugda sa labing job fair, ug ni Durato.

      Ang target nga petsa?  Mayo 1, adlaw sa pamuo.

          -o0o-

      Nitataw si Durato nga makumbinser lang ang placement agencies pag-anhi sa Sugbo kon kagarantiyahan sila nga may igong gidaghanon sa mga aplikante nga mas takos sa mga nangaplay sa ilang ulohang mga buhatan. Nisugyot siya nga, lahi sa nangaging job fairs nga maka-aplay sa bisan kinsang ganahan, himuon nang pasiunang pagpanglista aron mailhan ang labing takos nga mga aplikante. Gawas nga katabangan sila paghingpit sa mga panginahanglan sa di pa moatubang sa recruiters o employers.

     Sa iyang bahin, si Magno nipahibawo nga gisugyot sab ni Cebu City Councilor Joey Daluz nga makiglambigit sila sa Canada pagsusi sa kahigayonan nga ang Canadian employers, sa way pag-agi sa placement agencies, direktang mang-hire sa mga aplikante sa Sugbo ug sa mga lalawigan sa Kabisay-an ug Mindanao.

     Alang sa labing lab-as nga kalamboan sa mga trabaho sa Canada, padayon pagpaminaw sa DYAB 1512 khz o duawa ang http://dyab-cebu.blogspot.com. [30] leo_lastimosa@abs-cbn.com

Arangkada of Leo Lastimosa for February 26, 2008

          HADLOK SA EDSA?

 

          Ambot nganong way gana si Pres. Arroyo sa pagtimaan sa sumad sa Edsa People Power Revolution karong tuiga.  Kay kahibudngan kaayo.  Sa mga nakapahimus sa Edsa, way makalabaw niya.  Ang iyang pito ka tuig nang pamunoan, salamat sa Edsa Dos nga nipalagpot ni kanhi presidente Joseph Estrada niadtong 2001, maoy labing dakong ganti sa tanan.

          Ang kauga ni Arroyo sa Edsa unang nalilian duha ka semana ang nilabay dihang gideklarar sa Malakanyang ang Pebrero 25 nga special working holiday.  Nga segun sa Department of Labor and Employment usa ka naandang adlaw sa trabaho.  Sa wa pa kapasanginli nga gibarat rang sumad sa makasaysayanong adlaw, gidalidali niya pag-usab ang deklarasyon ngadto sa special non-working holiday.

-o0o-

          Sunod nga nabantang sa tibuok nasud ang kataphaw sa pagpasidungog ni Arroyo sa Edsa niadtong Biyernes, kanus-a gisugdan ang upat ka adlaw nga kasaulogan.  Sukwahi sa kasiga sa bulok sa iyang sinina ug sapatos, bug-at kaayo ang iyang dagway nga nangu sa kalihokan.

          Dihang gitawag na siya ni Executive Secretary Eduardo Ermita aron pagluwat sa iyang mensahe sa Edsa, wa siya mobarug ni moduol sa mikropono.  Hilaw nga niangkon si Ermita nga siyay nasayop.  Ug gidalidali pagtawag si kanhi presidente Fidel Ramos.

          Kansang pakigpung klarong wa makalingaw ni Arroyo.  Kay gisabonan ni Ramos ang pangurakot sa iyang pamunoan.  Ug nagpasumbingay pa gyod nga mahimong gikinahanglan na sab sa katawhan ang laing pagsakripisyo aron pagpatunhay sa kaligdong nga nadaog sa unang Edsa.

-o0o-

          Sa ikaupat ug kataposang adlaw sa kasaulogan, wa na gyod pakita si Arroyo sa Edsa.  Gipada na lang niya si Ermita.  Taphaw kaayong katin-awan sa palasyo nga nalinga si Arroyo sa ubang kalihokan.  Wa gyod gani bisan gamay na lang katin-awan nganong gikanselar ang Santos nga Misa.  Mas gihatagan pag importansiya ang pagpasabot sa pag-ungot sa pag-isa sa nasudnong bandila.

          Wa hinuoy nahibung nga wa na hatagi sa Malakanyang og higayon si Ramos sa pagdiskurso.  Maong gibasa na lang ni Ramos ang sinuwat niyang pakigpung sa mga sakop sa media.  Ug, nakatag-an mo, giawhag na sab niyang katawhan pagbanhaw sa Edsa.

-o0o-

          Mahimong way kabalak-an si Arroyo sa mga pagsaway ni Ramos.  Kinsa gihulagway nga wa na sab tingali mahatagi sa gipangayong pabor gikan sa Malakanyang.  Mahimo ganing makapangiyugpos lang gihapon si Arroyo bisan sa lapad nga mga protesta sa katawhan kay pabiling nagpaluyo niya ang militar ug kapolisan.

          Apan kinahanglan ba niyang isalikway ang kagahapon ug batokan ang kasaysayan?  Ingon ana na ba lang gyod kadako ang iyang kahadlok nga mapahinumdoman ang katawhan nga, bisan sa iyang malampusong paggusbat ug paggawong sa tanang demokratikanhong mga institusyon sa nasud, may gahom pa gihapon silang mopalagpot sa mga namunoan nga wa na nila saligi?  [30]  leo_lastimosa@abs-cbn.com

Arangkada of Leo Lastimosa for February 25, 2008

       HUMAN SA EDSA

 

       22 ka tuig human napukan ang diktadura ni Ferdinand Marcos, ang kinabag-an sa katawhan pabiling nag-ilaid sa katimawa.  Ang pangandoy nga makab-ot nang kausaban ug kalamboan nga gisaad sa nibanos nga mga pamunoan wa pay katumanan:

·        Ang pagbanhaw ni Cory Aquino sa demokratikanhong mga institusyon napakyas pagpahiuli sa hingpit nga kagawasan sa katawhan pagpili sa ilang mga tagduma;

·        Ang pagbungkag ni Fidel Ramos sa mga monopoliya wa makalugtab sa di makiangayong paagi pag-apud-apod sa nasudnong katigayonan;

·        Ang pagka paki-masa ni Joseph Estrada napakyas pagpapas sa kakabos ug kagutom sa kinabag-an; ug

·        Ang ekonomikanhong kalamboan nga gisangyaw ni Gloria Arroyo wa matilawi sa labing daghan, hinunoa nipasamot pagpaburot sa bolsa sa pipila.

-o0o-

        Tinuod nga, sukwahi sa ngitngit nga katuigan sa martial law, duna na tay mga piniliay.  Nga di si Marcos ray magbuot kinsay makadagan ug kinsay iyang ikaatbang.  Apan ang politikanhong mga dinastiya nagpabiling baskog.  Ang labing gamhanan ug adunahan ra gihapong mga pamilya ang nagkontrolar sa labing dagkong katungdanan sa kagamhanan.

        Ang bag-ong mga Comelec, labi na ubos ni Benjamin Abalos, gitulisok nga way kalainan sa Comelec ni Marcos.  Di kamaong moihap.  Gawas nilang Aquino ug Estrada, silang Ramos ug Arroyo pulos gipasanginlan nga nakatungtong sa katungdanan tungod sa pagpanikas.  Salamat sa kainutil sa mga lagda sa piniliay, ang labing taas og palit ug ang labing dagkog braso, bahala na kon taphaw ug plataporma ug nihit kaayog katakos ug kaligdong, maoy kanunayng manghawod.

-o0o-

        Napalayas tuod silang Marcos ug Estrada, nga pulos gipasanginlang mga kawatan, apan ang pagsurikbot sa katigayonan sa katawhan wa lang magpadayon kon dili gikahadlokan nga mas nagkahangol ug nagkapating pa.  Ang 10% nga mga komisyon niadto nahimo nang 20-30% karon.  O, kon tuohan si Jun Lozada, 100% na sa kaso sa NBN-ZTE.

        Ang pangilkil ilawom sa lamesa sa una gipadaylang na karon.  Nga bisan sa hawanan sa Malakanyang nagbaha nang suburno.  Ug bisan ang mga obispo nakadawat nag tambok nga mga sobre.

-o0o-

        Sama sa panahong Marcos, ang mga kabos bisan unsaon nilag kugi, bisag magbuntagay pag itos sa ilang singot pagpaningkamot, di gyod makahilwas sa katimawa.  Salamat sa talikala sa inhustisya nga nitugot sa labing adunahang mga magpapatigayon pagtumpi og minilyon ka pesos matag adlaw; samtang ang mga kargador sa pantalan mokita lag P150 bisan maabtan pag lawom nang gabii nga linukdohay sa sinakong mga kargamento.

        Ang 25 ka tuig nga pamunoang Marcos nakagusbat sa mga institusyon nga napugos na lang pagyangu-yango bisan unsay iyang gusto.  Sud lang sa pito ka tuig nga pamunoang Arroyo, gikahadlokan nga mas nagkabulingit pang militar, kapolisan, kongreso, simbahan, hukmanan, burukrasya ug bisan ang pribadong mga patigayon.  [30]  leo_lastimosa@abs-cbn.com

Arangkada of Leo Lastimosa for February 24, 2008

       TRAPIKO SA MANDAUE

 

       Ang kinasang-an sa Cebu North Road ug Canduman Road maoy saksi sa daghan ug duguon uyamot nga mga aksidente sa mga sakyanan.  Daghan kaayong mag-abot ning dulhugon nga bahin sa highway nga nagsumpay sa Mandaue ngadto sa amihanang kalungsoran sa Sugbo:

·        Mga sakyanan gikan sa Consolacion padung sa Mandaue;

·        Mga sakyanan gikan sa kinapusoran sa Mandaue nga moliko sa wala paingon sa Canduman;

·        Mga sakyanan gikan sa Canduman nga moliko sa tuo paingon sa kinapusoran sa  Mandaue; ug

·        Mga sakyanan gikan sa Canduman nga moliko sa wala paingon sa Consolacion.

Samtang nagkadaghan ang mga molupyo ug ang mga sakyanan, nagkadaghan sang mga bangga.  Nga niguba na sa kabalayan, mga tindahan ug ubang kabtangan.  Ug nikalas nag daghang kinabuhi.

-o0o-

        Mas nisulbong ang kabalaka nga mosamot ang suliran dihang nibalhin nang Sacred Heart School Jesuit sa Canduman uban ang gatosan ka mga sakyanan nga mapuno sa kadalanan.  Apan, sukwahi sa gikahadlokan, inanayng nasulbad ang suliran dihang nilingkod na si Mandaue City Mayor Jonas Cortes.

Una nilang gihimo mao ang pagdili na sa mga sakyanan gikan sa Canduman pagliko sa wala paingon sa Consolacion sugod sa alas-4 sa hapon.  Kanus-a maghuot na pag-ayong mga sakyanan sa manggawas ug mamauli nang mga tinun-an ug mga trabahante.

Naibanan tuod ang kahuot sa kinasang-an.  Apan wa pa gyod hingpit nga mahapsay.  Diha gihapoy pipila ka mga sakyanan nga nagkabangga.

-o0o-

        Ang sunod nilang gihimo maoy nakatibway sa suliran.  Gi-aspalto nilang gamayng dan sa luyo sa mga tindahan ug terminal sa mga tricycle duol sa eskina Canduman Road.  Sugod sa niaging semana, ang tanang sakyanan gawas sa Canduman adto na moagi didto.  Sa usa ka pamilok, naibanan dayon og katunga ang gidaghanon sa mga sakyanan nga mag-ilog sa apiking kinasang-an.

        Ang mga sakyanan sa Canduman nga padung sa Consolacion ug ubang amihanang kalungsoran mangita na lang og luna nga kalikoan.  Nga layo na gikan sa kinasang-an.  Ang mga pasahero ug mga motorista sa amihanang Sugbo nitug-an namo nga hapsay nang ilang biyahe.

-o0o-

        Hangtod nga moabot sila sa mga eskina paingon sa subdivisions sa Mandaue.  Ang labing huot karon nga mga eskina sa North Road mao ang sa Pagsabungan ug Tabok.  Salamat sa kapakyas sa bag-o pang nabansay-bansay nga traffic enforcers pagkakita sa mas dagkong hulagway.

        Kon dunay sakyanan o tawo nga mag-atang sa eskina aron makasal-ot sa baga nga bul-og sa trapiko, hunungon sa traffic enforcers ang mga sakyanan sa North Road.  Gatosan ka mga sakyanan ang mahunong ug maghuot alang lang sa matag usa ka sakyanan o usa ka tawo nga molabang.

        Kon tingbon inay tagsa-tagsaon pagpalabang ang mga sakyanan ug mga tawo, o kon makakita silag susamang sulbad sa kinasang-an sa Canduman, makaginhawa og luag ang trapiko sa Mandaue.  [30]  leo_lastimosa@abs-cbn.com  

Arangkada of Leo Lastimosa for February 23, 2008

       TABANG SA SAMAR

 

       Ang gipangtugnaw ug gipanggutom nga mga biktima sa lapad nga baha sa Eastern Samar ug ubang lalawigan sa Samar ug Leyte nagkinahanglan sa imong tabang.  Nawad-an sila sa ilang mga bay, kabtangan ug umahan tungod sa baha nga nilapaw sa ilang mga atop, nilubong sa tanan nilang hinagoan ug nibuwag nila gikan sa ubang bahin sa isla sud sa usa ka semana.

        Sa Eastern Samar nga maoy labing grabeng naigo, 10 ang namatay, 350 sa 597 ka mga barangay ang nagusbat sa baha, samtang 32,642 ka pamilya o 163,604 ka indibiduwal ang namakwet.  Ang mga lungsod sa Maslog ug Jipapad pabiling nalubong sa baha ug di kaagian ang kadalanan.  Ang kinatibuk-ang kadaot sa agrikultura gibanabanang moabot sa P64 milyones.

-o0o-

        Ang pasiunang hinabang sa mga Sugbuanon gipaabot nga mapada na ngadto sa Eastern Samar sunod semana.  Bugas, sardinas, tambal, sinina ug mga gamit sa bay ang nakolekta sa nakabuylo nang Kapamilya Relief Campaign alang sa Samar ug Leyte nga gipasiugdahan sa DYAB Abante Bisaya ug ABS-CBN Cebu.  Ang mga hinabang mahimong ihatod sa mosunod:

·        Barangay Hall sa Mabolo, Cebu City;

·        Wow Travel and More outlets sa EMall, Robinson's, Gaisano Mactan ug atbang sa Birhen sa Regla Parish; ug

·        ABS-CBN Regional Broadcast Complex sa Cebu North Road, Jagobiao, Mandaue City.

Wa mi motugot ni bisan kinsa pagpanguha og hinabang gikan sa mga panimay.  Busa pagbantay palihug sa mga mapahimuslanon.

-o0o-

        Salikwaot lang tan-awon nga samtang nag-antos ang mga biktima sa katalagman sa atong silingang mga lalawigan, dinhi sa Sugbo magsunog tag gasolina alang sa nasudnong lumba sa mga sakyanan.  Tinuod natakda nang kalihokan sa wa pang baha sa Samar ug Leyte, apan ang pagpasiugda ini taliwa sa lapad nga katimawa, sa paglumpayat sa presyo sa lana sa merkado sa kalibotan ug sa kalibotanong kahadlok sa pag-init tungod sa nagkadakong buslot sa ozone layer di gyod angayng pasidunggan.

        Di kay kana ra.  Ang mga tigpasiugda gusto pa gyong molisud-lisod sa mga pasahero ug mga motorista.  Ilang tak-opan ang South Coastal Road (SCR) sud sa duha ka adlaw aron makapatuyang sa ilang kalingawan.

-o0o-

        Ambot tungod ba sa iyang paningkamot nga mailhan ang SRP sa tibuok kalibotan, o di ba lang kabalibad sa iyang pag-umangkon nga maoy tigpasiugda, si Cebu City Mayor Tomas Osmena nalipat unsay mas mahinungdanon:  Ang pagpahapsay ba sa trapiko o kiat-kiat nga lumba?  Pila may maggasto sa mga tag-iya sa mga sakyanan nga magtapok dinhi kon itandi sa minilyon ka pesos nga balor sa kalangay ug kahasol sa trapiko tungod sa ilang pagtak-op sa dan?

        Si Mayor Osmena napugos pag-abli sa SCR kay gimandoan siya sa hukmanan.  Kinsa may nagtugot ron niya pagtak-op sa dan nga di siya maoy tag-iya?  [30]  leo_lastimosa@abs-cbn.com

Arangkada of Leo Lastimosa for February 22, 2008

          SAKSI BATOK LOZADA

 

          Nakabuylo nang kampanya sa kagamhanan paggusbat ni Rodolfo Noel Lozada Jr. human napakyas ang ilang panghudlat niya ug sa iyang pamilya.  Duna nay nangangkon nga opisyal sa Philippine Forest Corp. (PFC) nga nipasangil ni Lozada nga nagpataka lang og paghatag og mga luna ngadto sa iyang mga kadugo ug suod nga mga higala.  Ang saksi nga na-interview sa NBN (ang TV network sa kagamhanan, National Broadcasting Network, di ang kontrobersiyal nga National Broadband Network) nipasangil sab nga gilaktod ni Lozada ang nagkalainlaing mga transaksiyon sa PFC.

          Si Lozada, nga maoy presidente ug chief executive officer sa PhilForest, nikumpisal nang daan nga may mga nahimo siya niadto nga nakaiban sa iyang pagtahud sa iyang kaugalingon.  Apan napugos siya pagbisto sa eskandalo sa NBN kay di siya gustong hingpit nang mapilde ang iyang kalag.

-o0o-

          Ang nabisto pa lang nga gikuwestiyon nga mga transaksiyon ni Lozada sa PFC mao ang mga gibisto ni Senador Miriam Defensor Santiago atol sa labing unang pag-atubang ni Lozada sa Senado:

·        Ang pagpamalit ni Lozada og mga kanding gikan sa Australia gihulagway ni Santiago nga kahibulongan kay daghan man untang lokal nga mga kanding nga masuwayan kon mangaon ba og tubatuba; ug

·        Ang pagkuha ni Lozada og insurance policy nga ang iya ra sang asawa nga si Violeta ang insurance agent.

Human siya niangkon sa kahiwian atubangan ni Santiago, gipasabot ni Lozada ang gikuwestiyon nga mga transaksiyon sa ikaduha niyang pag-atubang sa mga senador.  Ang mga kanding alang sa breeding ug ang beneficiary sa iyang insurance policy di ang iyang pamilya kon dili ang PFC ra sab.

-o0o-

          Ang nahipos ni Santiago pasiuna lang.  Ang iyang mga dokumento gituohan nga maoy nadali-dali paghipos sa Malakanyang sa usa ka adlaw nga gintang gikan sa press conference ni Lozada sa La Salle hangtod sa iyang pag-atubang sa Senado.  Ang paggawas ni Erwin Santos, program development officer sa PFC, gipaabot nga masundan sa parada sa mas makadaot pang mga kasayuran batok ni Lozada.

          Unsa ba kaandam ang katawhan, nga nipasidungog sa kaisog ug kamatinud-anon ni Lozada, sa pagpakisayod sa uban niyang mga binuhatan nga nakapaubos sa iyang pagtan-aw sa iyang kaugalingon?

-o0o-

          Si Santos, sama ni Lozada, nihilak sab sa iyang pagbutyag og kasayuran batok sa iyang amo.  Apan mas pinugos.  Gibalik-balik una siya og pangutana ni NBN Anchor Mario Garcia nganong naghilak siya, ug taudtaod gyong nagsige og zoom-in ang camera sa iyang dagway, una nakatulo ang iyang mga luha.  Apan mas daghan ang sip-on nga iyang gisikma.

          Matod ni Santos nihilak siya tungod sa kahadlok nga makasohan sa iyang pagtuman sa "ilegal" nga mga sugo ni Lozada.  Nga lisod tuohan.  Kay nidangop na man siya sa kagamhanan mang wa igdungog sa kamatinud-anon pagpatuman sa mga balaod.  [30]  leo_lastimosa@abs-cbn.com

Arangkada of Leo Lastimosa for February 21, 2008

          DAYONG BANAGBANAG

 

          Sa wa pa katuyhakaw ang pangindahay ni Rodolfo Noel Lozada Jr. nga tungod sa lapad nga suporta gikan sa nagkalainlaing hut-ong sa katilingban maibanan nang pagpanghasi nga iyang mahiagoman gikan sa pamunoang Arroyo, nahagsa siya pagbalik sa yuta.  Giatake sa taas nga presyon sa dugo ang iyang asawang si Violeta human gikiha og perjury sa kapolisan.  Gipasanginlan si Violeta nga namakak sa pagpasaka sa mga petisyon alang sa writ sa habeas corpus ug amparo alang sa iyang bana.

          Segurong mabasura ang kaso batok ni Violeta.  Kay dihang gipasaka ang mga petisyon, wa niya igkita ang iyang bana nga gikuha sa kapolisan gikan sa dormitoryo sa La Salle sa way pagpahibawo asa siya dad-on.  Apan ang tuyo sa kaso di ang pagkonbikto.  Kon dili ang paghasol ug paghudlat lang sa tibuok pamilyang Lozada.

-o0o-

          Nahibawo tang tanan nga ang pagkiha bisan way klarong sukaranan maoy kinaham nga dangpanan sa dagkong mga opisyal sa kagamhanan nga di nang katarung og tubag sa mga pasangil batok nila.  Gawas nga magkabuang og panagang ang namasangil, mahimo pa gyong di na mahisgutan ang mga pasangil sa pangabuso ug kahiwian kon masang-at nang kaso ngadto sa korte.

          Salamat sa lapad nga suporta alang niya gikan sa mga abogado nga nitanyag sa ilang libreng serbisyo, makasugakod si Lozada pag-atubang sa tanang mga kaso nga mahunahunaang ipasaka sa Malakanyang.  Nakauna lang ang kapolisan.  May giluto na sang laing kasong kriminal ang buhatan sa solicitor general.

Apan wa maanad ang pamilyang Lozada ning maong matang sa pagpanghasi.  Hinaot nga di sila lupigon sa kahadlok ug kaluya.  Hinaot nga ang kainit sa mga pangaliya sa katawhan nga nituo sa kamatinud-anon ni Lozada igo nga makapalahutay nila.

-o0o-

          Ang nikiha ni Violeta mao si Koronel Paul Mascariñas, ang Bol-anon nga luyuluyong hepe sa PSPO, nga maoy nangangkon nga nangu sa mga polis nga nikuha ni Lozada gikan sa NAIA.  Nga dako kaayong baligho.

          Si Mascariñas nga gipasanginlang namakak sa iyang testimoniya sa Senado wa pa makiha sa perjury.  O kidnapping.  Mao na hinoy nangiha.

-o0o-

          Kon magpadayon ang paglihok sa nagpakabana nga mga hut-ong sa katilingban, mahimong di na magdugay ang paglihay-lihay sa pamunoang Arroyo sa responsibilidad pagtubag sa way kinutobang mga eskandalo.  Human nagkara-kara pagpasiugda og lipat-lipat nga mga imbestigasyon, pagtukod og taphaw nga mga komitiba ug pagdali-dali pagsuspenso sa gidudahang mga proyekto, mahimong mapugos na gyod si Pres. Arroyo pagtubag sa mga pasangil sa pagpanikas, pagpamakak ug pagpangawat batok niya.

          Maong angayng mangdam si Lozada ug ang katawhan nga nagpaluyo niya sa mas bangis nga mga pagpanghasi.  Kay tinuod ang sulti sa atong katiguwangan.  Ang labing ngitngit nga bahin sa kagabhion mohakop sa dayong buak sa banagbanag.  [30]  leo_lastimosa@abs-cbn.com

Arangkada of Leo Lastimosa for February 20, 2008

          KASAYURAN NI NERI

 

          Bisan nagdumili na pagbalik sa Senado ug pagtubag sa dugang mga pangutana sa mga senador labot sa NBN-ZTE scandal, labi na mahitungod sa papel ni Pres. Arroyo ug sa iyang banang si First Gentleman Mike Arroyo sa transaksiyon, si Ched Chairman Romulo Neri wa mobakwi sa mosunod nga mga pamahayag nga iya nang naluwatan:

·        Gitanyagan siya ni kanhi Comelec chairman Benjamin Abalos og P200 milyones nga suburno bugti sa pagpalusot sa transaksiyon;

·        Gisumbong niya ngadtong Pres. Arroyo ang pagsuway ni Abalos pagsuburno niya;

·        Gitambagan siya sa presidente pagsalikway sa tanyag ni Abalos;

·        Ang orihinal nga sugo sa presidente nga ipatuman ang NBN pinaagi sa BOT (build-operate-transfer) aron way gasto ang kagamhanan bisan usa ka dako; ug

·        Dihang naaprobahan, mangutang nang Pilipinas og $329 milyones gikan sa China aron mapatuman ang proyekto.

-o0o-

          Sakto si Pres. Arroyo sa pagtambag ni Neri sa di pagdawat sa suburno nga giingong gitanyag ni Abalos.  Apan way pamahayag nga giluwatan ang Malakanyang, bisan ek na lang, mahitungod ini.  Sa kadaghan sa mga turutot sa palasyo, way bisan usa nila nga nidason sa sulti ni Neri.  Wa say nihimakak.  Nabalaka ba sila nga ang pagkomentaryo nila sa sulti ni Neri makapabaha og mga pangutana nga mas lisod tubagon:

·        Unsa may gihimo ni Pres. Arroyo human nadawat ang sumbong ni Neri batok ni Abalos?

·        Samtang di makiha si Abalos sa siya pay tsirman sa Comelec, nganong wa man niya itaral si Abalos sa hukmanan dihang ni-resign ug nawad-an nag immunity?

·        Wa ba diay madapit ang iyang pagtagad nganong si Abalos, nga linga na unta niadtong higayona pagpangandam alang sa piniliay sa 2007, nag-apil-apil man sa transaksiyon nga layo ra kaayo sa prinsipal niyang gimbuhaton?

-o0o-

          Bisan kon kalimtan nato kadiyot ang mga pamahayag ni Rodolfo Noel Lozada Jr., ang mga kasayuran nga gihatag ni Neri sa wa pa siya motak-om igo nang makapahimutang sa pagduda sa kamatinud-anon sa kagamhanan pagsubli sa NBN.

          Samtang si Lozada nitumbok sa kalambigitan sa magtiayong Arroyo pagpalusot sa transaksiyon, si Neri nakaluwat og mga kasayuran nga nakamugna og higanteng buslot sa kaligdong sa proyekto.

-o0o-

          Mao ba ni hinungdan nga alang sa kalibotan sa Malakanyang mora lag way nasulti si Neri batok ni Abalos?  Ug mora lag wa siyang katug-an nga BOT, di utangon, ang proyekto?

          Ang argumento sa DOTC nga mas mahal ang BOT dakong sagpa sa presidente.  Nagpataka ba lang diay siya pagsugo ni Neri nga di mangutang alang sa NBN?

          Di nila maluwas ang presidente sa way paghingan ni Neri nga bakakon.  Ug di kana nila mahimo sa way pagrisgo nga, bisan uwahi na, pillion ni Neri ang "kahayag" nga gitanyag ni Lozada.  [30]  leo_lastimosa@abs-cbn.com

Arangkada of Leo Lastimosa for February 19, 2008

          MGA SUNGAYAN

 

          Ang makabungog nga kahilom sa Sugbuanong mga politiko sa NBN-ZTE scandal maoy masulub-ong pahinumdom sa mga hinungdan nganong nikuyanap nang pangurakot sa tanang ang-ang sa kagamhanan ug sa katilingban.  Silay nagrepresentar sa lapad nga pagpabaya nga maoy gipahimuslan sa mga kawatan nga nisamot lang kahangol ug kagutom samtang nagkadako nang ilang tiyan ug bubonlan kay wa nay laing kasudlan sa ilang natumpi nga ilegal nga katigayonan.

          Mahimong tak-om ug nangiyugpos ang mga politiko sa Sugbo tungod sa bisan hain sa mosunod nga mga hinungdan:

·        Managsama silang katol ug balhibuon og kamot;

·        Managsama sila og partido;

·        Dako silag utang kabubut-on sa mga nasakpan; ug

·        Hadlok silang mautingkay sang ilang kaugalingong mga baho kon magsaba-saba.

-o0o-

          Daghang niawhag namo sa paghubad sa pangaliya nga gilitok ni Lozada human sa Santos nga Misa sa La Salle niadtong Dominggo.  Samang pangaliya ang gilitok sa mga pari ug mga madre ngadtong Lozada sa dayon niyang atubang sa mga senador sa labing unang higayon.  Niang among pangahas nga hubad sa pangaliyang, "Today I Star The Change I Want To See."

          "Ginoo, himoa kong mao ang kausaban nga buot nakong makit-an

          Paghimo ginamit ang kalig-on ug kaalam

          Sa tanang kinahanglang buhaton

          Ug mahimong paglaom nga akong gipangandoy.

          Palingkawasa ko sa akong mga kahadlok ug panagana

          Hatagi ko sa kaisog ug kamapaubsanon

          Pun-a ko sa diwa pag-atubang sa hagit

          Ug sugdan nakong kausaban nga buot nakong makit-an.

          Karong adlawa, akong sugdan ang kausaban nga buot nakong makit-an

          Bisan di ako ang kahayag, mahimo akong pabilo

          Sa pagtuo, pangalagad ug pakighiusa

          Atong sugdan ang kausaban nga buot natong makit-an

          Ang kausaban nga magsugod nako.

-o0o-

          Human gibutyag ni Rodolfo Noel Lozada Jr. ang mabulukong pung nga gigamit ni Ched Chairman Romulo Neri paghulagway ni Pres. Arroyo, gibahaan mi sa mga text ug emails sa nagpakabanang mga Sugbuanon sa nagkalainlaing kahulogan sa, nakatag-an mo, "evil."

          Ang Princeton nihubad ini nga bisyo, makadaot, makaguba, ug makamugna og dakong katalagman.  Ang Wikipedia nihulagway ini nga kadaotan nga way tanlag.  Ang carm.org nipanag-ing ini sa pag-alsa batok sa Ginoo ug pagsupak sa tanang balaanong sugo.  Ang mirriams-well.org niingon nga mao ni kaatbang sa kaayuhan, nagpasabot sa tanang salawayon, makapasakit ug yawan-ong mga tinguha.

-o0o-

          Mahimo sab ning magkahulogan nga pagpamakak, pagpanikas ug pagpangawat.  Kon masakpan, way pupanagana nga motago sa mga ebidensiya, mopahilom, mohaylo ug manggukod sa mga namasangil.

          Apan way kadaotan nga molupig sa kaayuhan.  Way kangitngit nga di matunaw sa kahayag.  Way pagpahimus nga molungtad hangtod sa kahangturan.  [30]  leo_lastimosa@abs-cbn.com

Arangkada of Leo Lastimosa for February 18, 2008

       KADAOGAN NI LOZADA

 

       Bisan unsa pay dangatan sa iyang expose batok sa pamunoang Arroyo, nagmalampuson na si Rodolfo Noel Lozada Jr. pagpukaw sa katawhan nga nitugot na lang nga kawatan, tikasan ug bakakan sila sa atubangan.  Gawas sa makapakugang niyang kasayuran, si Lozada niluwat sa makahuloganong mga pamahayag nga nakapukaw sa atong tanlag:

·        Human sa misa sa La Salle, nikumpisal nga niatubang siya sa Senado aron pagluwas sa iyang kalag apan wa magdahom nga mahimong naluwas sab  diay niyang kalag sa nasud; ug

·        Sa iyang pag-atubang sa mga opisyal sa administrasyon sa "Harapan" TV special sa ABS-CBN niadtong Sabado, niingon nga nisuway lang siya pagpanalipod sa kamatuoran apan iyang nakaplagan nga ang kamatuoran maoy nanalipod niya.

-o0o-

        Ang iyang duha ka adlaw nga testimoniya sa Senado, napuno sab sa makapahinuklog nga mga pung paghulagway sa kahakog sa mga namunoan ug sa kahuyang sa sistema sa kagamhanan:

·        Way makalalis sa katinuod sa tambag ni Ched Chairman Romulo Neri ngadto niya "to moderate their greed;" ug

·        Way makalabaw sa katukma sa iyang paghulagway sa mga transaksiyon sa kagamhanan nga "dysfunctional" kay inay "need-driven," nga mag-agad unta sa panginahanglan sa katawhan, nahimo na hinuong "supply-driven," sa ato pa gipahaom sa pangurakot sa mga tigpasiugda.

Wa makadaot sa kawsa ni Lozada ang kaabunda sa iyang mga luha (kay, segun sa iyang maguwang nga tricycle driver, kapayason na man diayng daan sa bata pa).  Ug ang iyang kasiaw:

·        Nireklamo nga naka-quota siya sa pamalikas ni Abalos nga gipasanginlang nihulga pagpatay niya pinaagi sa telepono niadtong Enero 18, 2007; ug

·        Gihulagway ang iyang kaugalingon nga "talentado."

-o0o-

        Bisan naalkanse siya sa format sa "Harapan" sa ABS-CBN, kay di man dayon siyang katubag sa sulti sa mga opisyal nga nagtinabangay pagkulata niya, si Lozada ang klarong nagmadaugon sa binayloay.  Pagsugod sa "Harapan," 65% ray nituo sa iyang expose.  Dayong human, niabot nag 92%.

Di iyang kamisin, nga giatbangan sa mga barong tagalog ug amerikana, maoy nakahatag og bentaha ni Lozada.  Kon dili ang, nakatag-an mo, kamatuoran.

-o0o-

        Gawas nga wa matarug ang iyang testimoniya sa kahiwian sa NBN ug sa pagdagit niya sa NAIA, niang lab-as niyang kadaogan:

·        Dangog pas halwan si kanhi Comelec chairman Benjamin Abalos paglikay sa hagit ni Lozada nga ipakita ang ilang phone bills gikan sa Septiyembre 2006 hangtod sa Enero 2007 aron mapamatud-ang si Abalos nagsige og tawag niya ug sa hagit sa publiko nga mopaubos silang duha sa lie detector test; ug

·        Mas makiangayon ang iyang baruganan nga di inutil ang kagamhanan sa mga kundisyon sa langyawng pautang kay sa de-kahon nga argumento ni DOTC Asst. Sec. Lorenzo Formoso nga wa tay mahimo gawas sa pagdawat sa bisan unsang kundisyon sa Tsina ug ubang giutangang mga nasud.  [30]  leo_lastimosa@abs-cbn.com