PAUGAT SA BUGAS
Haskang luoya sa mga Sugbuanon. Maglaway lang sila sa family access cards nga gipanghatag sa DSWD sa NCR. Nga mao na lay kabaligyaan sa labing baratong NFA rice sa mga Tindahan Natin sugod karong buwana. May kadagkoan lang gihapon sa kagamhanan nga nagtuong ang Pilipinas magsugod ug matapos sa Metro Manila.
Matod sa DSWD wa pay bisan usa ka family access card nga gihatag dinhi sa Sugbo. Ang pagpili sa mga baligyaan sa NFA rice hingpit nga gisalig ngadto sa mga tag-iya sa Tindahan Natin. Nga mahimong nag-apas sa mas dakong ginansiya ug labihan kasipsip sa gamhanang mga politiko aron maningkamot nga ang labing kabos nga mga pamilya maoy mabaligyaan sa tag-P18.25 matag kilo nga bugas humay.
-o0o-
Ang family access cards gipasikad sa lista sa labing kabos nga mga molupyo gikan sa mga mayor sa Metro Manila. Apan dihang gisusi sa DSWD, nasakpan nga naapil ang mga dugay nang nangamatay ug ang mga buhi pa gibalikbalik sa paglista. Manguros na lang tang daan giunsa pagmaniobra ang lista sa mga gibaligyaan sa Tindahan Natin sa Sugbo nga hinimo sa mga magpapatigayon ug mga politiko.
Nga dakong baligho. Gikuha ang baratong bugas gikan sa kamerkadohan aron di na si bisan kinsa lay makapalit, nga mahutdan na hinuon ang mga kabos nga mao gyoy nagkinahanglan. Apan gilawog na hinuon ngadto sa mga buaya sa mga Tindahan Natin, nga mas tago ug busa mas sayon rang gimaniobra nga nahatag ngadto sa mga pinalabi inay sa mga tabanganan.
-o0o-
Di monopoliya sa mga Tindahan Natin ang maniobra sa NFA rice. Wa sab papiri ang lokal nga mga opisyal nga, ambot unsay bakukang nga nasud sa alimpatakan sa kadagkoan sa NFA, gitugotan sang makapamaligya sa baratong bugas humay.
Inay P18.25, gipamaligya sa mga politiko ang bugas og P25 ngadto sa P28 matag kilo. Di pa na igo, gikuwangan pa gyod ang timbang sa bugas nga gipamaligya. Ang ilang mga dumadapig maoy nabuhong. Kay samtang gihigpitan og kinilo ang ubang pumapalit, gitugotan ang mga pinalabi nga makapangompra og sinako.
-o0o-
Ang NFA mismo di kalingkawas sa mga tulisok. Gitugotan nilang makapaburot sa ginansiya ang mga magpapatigayon ug makasabotahe sa suplay ang mga politiko, atubangan sa nagbuntaog nga kasilag sa katawhan sa krisis sa bugas. Di kana ra. Napakyas pa gyod ang NFA pagtino sa kalidad sa kinomprang bugas gikan sa gawas sa nasud. Sama sa usa ka barkong bugas nga niabot gikan sa gawas karong bag-o. Nga gihulagway nga lagom ug dugmok.
Sa nangaging katuigan, ang bugas ipada sa hilit nga mga lalawigan. Apan bag-o lang ang ani sa maong mga lalawigan. Mao nga sa gusto nato o sa dili, ang mga Sugbuanon mapugos pagkaon sa lagom ug dugmok nga bugas. [30] leo_lastimosa@abs-cbn.com
No comments:
Post a Comment