Arangkada of Leo Lastimosa for March 10, 2008

PULOS NAGTAGO

 

Clark, Pampanga—Nagsige og bagulbol ang Malakanyang nga alkanse sila sa coverage sa media sa mga eskandalo nga gipasangil batok ni Pres. Arroyo.  Matod nila mas manggihatagon ang mga estasyon sa radyo ug telebisyon sa ilang airtime ug ang mga pamantalaan sa ilang mga pahina alang sa oposisyon.
    

Di na bag-o ang reklamo.  Maong karaan na sang tubag sa media.  Hatagan ta mo sa duha ka labing klaro ug labing kinaham kay di malalis nga mga panagang:  Una, nihit ang kasayuran nga nakuha sa media gikan sa mga opisyal sa kagamhanan; ug ikaduha, mas nihit ang ilang gitug-an nga kamatuoran.
               -o0o-
  

Unahon nato pagtuki ang kapangitaon sa kamatuoran sa kagamhanan.  Wa tingali molabaw sa kadangog sa kamatuoran sa Hello Garci scandal.  Hangtod karon, tulo ka tuig na human sa pagkabisto sa eskandalo, ug upat na ka tuig human sa piniliayng presidensiyal sa
2004, wa pa gyoy katin-awan nga giluwatan si Pres. Arroyo nganong nag-telebabad silang kanhi Comelec commissioner Virgilio Garcillano samtang nagpadayon pang iskutenyo.
    

Ang pagtak-om ni Arroyo nanakod sa ubang mga opisyal sa administrasyon.  Ang mga wa matakdi gibusalan ang baba aron di makatabi pinaagi sa EO 464 ug, dihang gibasura na sa Korte Suprema, sa executive privilege.
 Gawas nga islag sa kamatuoran, ang pamunoang Arroyo nilihay ug nitago pa gyod gikan sa tanang kahigayonan sa pagtubag.
              

-o0o-

Mao nga bisan ang labing yanong mga pangutana sa mga senador ug mga kongresista di nila tubagon.  Gipasanginlan hinuon ang mga magbabalaod nga namolitika ug nagtinguha pagpukan sa kagamhanan.

Bisan ang mga sakop sa media giduhig.  Ang igo lang nangutana ug determinadong naningil og mga tubag gitulisok nga nagpagamit sa oposisyon, mga komunista, mga rebeldeng sundawo ug, karong bag-o, mga terorista.  Inay tubagon, gipanggukod, giposasan, gitaral sa hukmanan ug ang pipila pintas gyod nga giluba ug gihunosan sa kinabuhi.


         -o0o-

Way sukaranan ang pangangkon nga inutil ang kagamhanan pagpanalipod sa iyang kaugalingon sa media.  Ang kagamhanan makapalihok sa iyang labing gamhanang makinarya sa propaganda.
      

Kinsa may nag-ingon nga Malakanyang ray makatubag sa mga pasangil?  Inay mag-usik-usik sa panahon pagpirma og mga manifesto pagsuporta ni Arroyo ug pagwaldas sa buhis sa katawhan pinaagi sa pagbayad sa mahalon nga full page advertisements, nganong di man suguon sa palasyo ang iyang alyadong mga mayor, gobernador, kongresista ug senador pagtabang pagtubag?  Bisan mao na lay bugti sa nagbaha nga mga pahalipay nga ilang nadawat gikan sa Malakanyang?
  

Kon mahitabo, inay mag-unay magkahiusa na silang Mayor Tomas Osmena ug Gobernador Gwen Garcia pagdupa ni Arroyo.  Kana kon kumbinsido silang putli ang pamunoan.  Ug nga wa lang sila motila sa Malakanyang kay gawas nga utro sab silang naglihay sa kahigayonan pagtubag may mga tinagoan sab nga di ganahang mahibaw-an sa katawhan.  [30]  leo_lastimosa@abs-cbn.com