SUWAT NI LOZADA
Mao ning akong hubad sa suwat ni Rodolfo Noel Lozada Jr. nga gipada sa Black and White Movement, usa sa mga pundok nga nangampanya sa pagpalagpot ni Pres. Arroyo gikan sa Malakanyang:
"Gusto nakong pasalamatan ang tanan tungod sa inyong pangaliya ug pagpaluyo.
"Usa ako ka saksi ug biktima sa mga pagsuway sa kagamhanan pagluok sa kamatuoran mahitungod sa ilang pangurakot aron nga di mahibaw-an sa katawhan. Una ko nilang gisuwayan pagpahilom hangtod sa hangtod niadtong Pebrero 5 ug dihang napakyas sila pagkutlo sa akong kinabuhi ila karong gisuwayan pagbuong ang akong kadungganan aron nga di gyod mahibaw-an ang kamatuoran.
"Ang kagamhanan nagpasiugda na sab sa ila nang gihimo sa nangaging mga eskandalo ug mga anomaliya, ang paglubong sa kasayuran pinaagi sa mga bakak!
"Hangtod karon wa nila tuguti ang mga sakop sa PNP ug PSG nga nikuha nako gikan sa NAIA niadtong Pebrero 5 sa pagpakita ug pagtubag sa mosunod nga mga pangutana:
1. Kinsay nagsugo nila pagdagit nako sa tugpahanan niadtong Pebrero 5?
2. Kon tinuod nga giila ko nilang VIP, nganong wa man sila magpaila dihang nangutana ko kinsa sila?
3. Nganong gida man ko nila sa SLEX paingon sa Cavite, dayon sa Laguna dihang ako silang giingnan nga magpahatod ko sa among bay sa Pasig?
4. Nganong si Heneral Razon namakak man sa publiko nga ako ug ang akong maguwang babaye nisuwat niya pagpangayo og seguridad nga wa man na namo buhata? Nganong giusab-usab man niya ang iyang istorya katulo ka higayon?
5. Nganong si Usec. Gaite nihatag man nako og P500,000 ug ang Malakanyang may tulo ka bersiyon sa ilang katin-awan?
6. Nganong si Usec. Gaite nihatag man nako og abogado, sa way pagkuha sa akong pagtugot, nga nipapirma nako og bakak nga affidavit?
"Mao ni ang mga pangutana nga di gusto sa kagamhanan nga matubag kay mosangko man sa mga tawo nga di gusto nga ang kamatuoran sa NBN-ZTE mahibaw-an sa publiko, sila ang katawhan nga gustong magpabilin ang mga Pilipinhon sa kangitngit diin sila maoy manghawod, sa kangitngit sila makapadayon sa pagpangawat gikan sa katawhan sa ilang salapi ug pagtulis sa katawhan sa ilang mga pangandoy alang sa ilang kaugalingon ug sa mga anak sa ilang mga anak.
"Giawhag ko kamong tanan, sa palihug ayaw pagtugot ning gobyernoha sa paglubong sa ilang pagdagit nako uban ang dugang mga bakak ug ayaw tuguti nga, sa makausa pa, makalighot na sab sila. Kay inyo na sang pasagdan nga makalimtan ang kamatuoran sa NBN-ZTE, sama sa nahitabo sa mga kamatuoran mahitungod sa Hello Garci, ni Joc Joc Bolante, sa Macapagal Highway, ni Marilyn Esperat, sa Northrail ug daghan pang uban nga wa gyod ninyo maangkon.
"Daghang salamat sa inyong panahon ug pagbasa.
"Jun Lozada" [30] leo_lastimosa@abs-cbn.com
No comments:
Post a Comment