GAMOT SA KRISIS
Unsaon pagsulbad ang suliran nga wa nimo angkona? Mao ni ang labing dakong suliran ni Pres. Arroyo. Di siya gustong moangkon nga dunay krisis sa bugas. Maong nagyagaw ang mga lakang nga iyang gihimo pagsulbad ini.
Niinsistir siya nga abunda ang suplay sa bugas sa kagamhanan ug sa pribadong sektor. Apan ang mga trak nga gikargahan og bugas gipaubanan na niyag armadong mga sundawo. Tungod sa kabalaka nga mas motaas pang pila sa NFA rice outlets sa kamerkadohan, nga klarong mosukwahi sa iyang pangangkon, kuhaon niyang bugas nga tag-P18.25 ang kilo gikan sa mga merkado ug itugyan ang pag-apud-apod ngadto sa iyang alyadong mga politiko.
Sa wa pang kasugod pagsaulog ang iyang mga batabata nga magpiyesta na sila sa baratong bugas, iyang gipahibawo nga 100,000 ra ka pamilya ang pasiunang mahatagan og bugas. Ug silang tanan tua mahimutang sa Metro Manila.
-o0o-
Sa dul-an sa 90 milyones ka Pilipinhon, 100,000 ra ba diay ang di kaabot sa nilumpayat na pag-ayong presyo sa commercial rice? Taga Metro Manila ra ba diay ang gipanggutom? Nituo ba diay si Arroyo sa iyang kaugalingong propaganda nga abunda ug barato ang bugas sa mga lalawigan?
Wa ni kalainan sa binuang nga programa ni Arroyo pagpanghatag og NFA rice sa mga tinun-an sa kinder ug Grade 1 sa mga eskuylahang publiko. Ang pamilya nga wa gyod intawoy nahot ug nagkinahanglan gyod unta og tabang maglaway lang sa libreng bugas kay naa na sa Grade 2 ang ilang anak. Sa pikas nga bahin, ang pamilya nga duna untay ikasarang, mahimo ganing makapalit og commercial rice, malibre sa bugas tungod lang kay duna silay kinder.
Mas makiangayon pa tingali kon nisugo si Arroyo nga ang mga gagmay rag tiyan ang hatagan. Mas daghan pa tingaling mohimsog kay mapugos pagpahiyos sa nagbusyad nilang tiyan.
-o0o-
Ang hugtanong pagdumili ni Arroyo pag-angkon sa suliran tinuyo. Mao ni labing mahinungdanong gimbuhaton, alang niya, aron magpabilin siya sa gahom. Kay kon iyang angkunon ang krisis sa bugas ug ubang mga eskandalo sa iyang pamunoan, mapugos siya pagsubay sa mga hinungdan aron makab-ot ang kasulbaran.
Ang labing dako niyang kahadlok mao nga matultolan nga ang gamot nga hinungdan sa tanang bulilyaso sukad sa iyang paglingkod sa katungdanan mao siya.
-o0o-
O, ang mas makiangayong pagkasulti, ang dunot nga pamolitika nga iyang girepresentahan: Ang pagpalabi sa iyang personal nga mga interes kay sa mas dakong kaayuhan sa mas daghan.
Nga mosangpot sa pagpangawat. Sa pagpamakak. Sa pagpanikas sa mga piniliay. Sa paglugos sa mga institusyon. Sa pagbuakbuak sa nasud ug sa katawhan.
Mahadlok si Arroyo nga manamin. Kay ang makalilisang nga dagway ug bayhon sa kahangol ug kamapahimuslanon sa gahom ang iyang makit-an. [30] leo_lastimosa@abs-cbn.com
No comments:
Post a Comment