BODEGA NI KING
Kon di pa tungod sa krisis sa bugas, wa untay maghasol sa 30,000 ka sakong Vietnamese rice nga gibutang ni Regan King sa inabangan niyang bodega sa Cabancalan, Mandaue City. Bisan pa kon gitanggong ang bugas kay may taho nga nadawat ang Bureau of Customs nga pinayuhot ang kargamento, magmata lang unta og buntag ang mga Sugbuanon kay wa may nagtagad pagpahibawo nila unsay problema sa transaksiyon sa batan-ong magpapatigayon.
Salamat sa nagkarakara nga mga lakang sa kagamhanan pagsulbad sa krisis sa bugas nga wa nila angkona, ug salamat sa kahigwaos sa NFA ug NBI pagdason sa pasangil ni Pres. Arroyo nga may maniobra sa suplay ug presyo sa bugas humay, natiktikan ang kasikas sa bodega 52 ug nahimo karong sentro sa kontrobersiya.
-o0o-
Salamat sa kontrobersiya ni King, nitumaw ang mosunod nga mga pangutana nga mahimong makapalili nato sa tinuorayng kahimtang sa industriya sa bugas:
· Kon may lisensiya ang Jolli Trading International Inc. nga gipanag-iya ni King pag-import og bugas humay, nganong igo ra man siyang nipakyaw bugas nga kinompra sa mga kooperatiba sa mga mag-uuma?
· May katakos ba ang napu ka mga kooperatiba nga gipangulohan sa Giling Samahang Nayon Multipurpose Cooperative pagpamalit og 30,000 ka sakong bugas gikan sa Vietnam; o ang kuwarta nang King maoy ilang gigamit?
· Gawas ni King, kinsa pa may ubang mga magpapatigayon nga igo lang nikabayo sa ngan sa mga kooperatiba sa mga mag-uuma aron pagpasayon sa ilang pag-import og bugas humay?
· Hain na man paingon ang nidunggo sa sugbo nga dul-an sa 1,000 ka toneladas nga bugas humay nga importasyon sa Pacarzo Multi-Purpose Cooperative, Gideon Multi-Purpose Cooperative, Moonlight Multi-Purpose Cooperative ug Flores Multi-Purpose Cooperative?
-o0o-
Matod ni NFA 7 Director Danilo Bonabon maka-import lang og bugas ang usa ka kooperatiba kon ilang mapamatud-an nga buhi pa ug rehistrado sa SEC ug CDA. Niangkon hinuon siya nga wa na silay kasayuran kinsay tinuod nga mga kooperatiba ug kinsay igo lang gihimong dummies sa mapahimuslanong mga magpapatigayon.
Nitataw hinuon si Bonabon nga bisan kinsa pay mo-import og bugas humay—kooperatiba, pribadong mga kompaniya ug bisan NFA—pahamtangan sa customs og managsamang buhis: 50% sa bili sa kargamento.
-o0o-
Samtang naka-iskor dayon ang NFA ug NBI pila lang ka oras human sa pagkatukod sa interagency task force batok sa rice hoarders, wa pa silay klarong mga lagda unsaon pag-ila ang mga bodega nga nagtago og bugas gikan sa mga bodega nga gihimo lang normal nga pundohanan.
Si NBI 7 Director Medardo de Lemos niingon nga mag-agad lang sila sa NFA. Si Bonabon igo lang sang nitambag nga kadudahan nang bodega kon nagsugwak nang bugas apan ang tag-iya wa gyod magtagad sa pagpamaligya. [30] leo_lastimosa@abs-cbn.com
No comments:
Post a Comment