Arangkada for June 9, 2008

          TABANG SA ISLA

 

          Sakay sa Sky Patrol—Ako ning gisuwat samtang naglupad mi pauli sa ABS-CBN Broadcast Complex gikan sa isla sa Bantayan.  Malampuson namong naapud-apod ang mga hinabang sa mga Sugbuanon nga natigom sa Kapamilya Relief Campaign sa DYAB Abante Bisaya.  Makapatandog ang kamapasalamaton sa mga biktima sa bagyong Frank sa sinakong bugas, sardines, noodles ug sinina nga ilang nadawat.

          Mapagarbuhon kong nipasalig nila nga manggihatagon ang ilang mga kapamilya sa mainland sa Sugbo.  Mas malipayon kong nipakita nila sa mga ebidensiya sa talagsaong kamanggihaton:  Nagbundo nga mga pinutos nga mga hinabang nga gipabaha, giputos, gihakot ug giapud-apod sa mga Sugbuanon nga wa magmakuli pakigsawo sa ilang bililhong kabtangan, salapi ug panahon.

-o0o-

          Ikatulo na ning higayon nga direkta kong nakasinati sa kamapuslanon sa among Sky Patrol (palihug pugngi ko sa pag-detalye sa kadako sa among gasto sa inadlawng maintenance sa chopper ug sa suholan sa mga piloto):

·        Gisayun-sayon lang namog tabok ang Sugbo ug ang St. Bernard, Southern Leyte sa paghatod sa nagbaha sang hinabang sa mga Sugbuanon alang sa mga biktima sa pagdahili sa bukid sa Guinsaugon duha ka tuig nang nilabay;

·        Dungan namong napahigayon ang upat ka dagkong kalihokan sa mga isla sa Sugbo ug Negros—ang job fair, ABS-CBN company outing ug KBP Seminar sa Libel ug Media Ethics dinhi sa Sugbo ug Kapamilya Relief Campaign sa mga dakbayan ug kalungsoran sa Negros Oriental nga naigo sa baha ug pagdahili sa yuta; ug

·        Pagkanaog nako sa ayroplano gikan sa Manila gipasakay dayon ko sa Sky Patrol aron pagsugat sa among kaubanan nga naghakot sa relief goods paingon sa Bantayan.

-o0o-

          Ang among kaubanan naabtan og upat ka oras pagbiyahe sakay sa mga sakyanan sa Central Command (CentCom), ABS-CBN ug DYAB gikan sa Jagobiao, Mandaue paingon sa pantalan sa Hagnaya ug paglawig sa barge paingon sa Sta. Fe.  Salamat sa Sky Patrol, 30 minutos rang among biyahe gikan sa ABS-CBN Complex paingon sa Bantayan.

          Pag-abot nako, maoy pagsugod sa paghatag sa mga hinabang ngadto sa gatosan ka mga biktima sud sa Bantayan Sports Complex, nga parsiyal sang naguba sa bagyo.  Silang Mayor Geralyn Escario ug mga kapitan sa 14 ka naapektahang barangay ang nitabang namo.

-o0o-

          Di tanan sa 1,400 ka pamilya nga nawad-an og mga panimay sa Bantayan ang among nahatagan.  Kini kay wa mapaigo sa among mga sakyanan ang tanang relief goods nga among naputos.

          Hinaot nga makabalik mi sa Bantayan karong semanaha.  Kon paminawon sa Philippine Navy ang pakitabang sa DSWD paghakot sa relief goods sakay sa ilang barko.  Nianang higayona, mada na sab namo ngadto sa silingang mga lungsod sa Sta. Fe ug Madridejos ang dugang kalig-onan sa pag-unong sa ilang mga kapamilya sa mainland.  [30]  leo_lastimosa@abs-cbn.com