UGMA NI GLO
Aron pagpanagang sa sibaw nga mga pagsaway sa iyang pagduaw sa Estados Unidos bisan sa dakong katalagman sa nasud, nagkara-kara si Pres. Arroyo pagduaw sa nagkalainlaing mga dapit nga naigo sa bagyong Frank. Sa wa pa moduaw sa Sugbo, giduaw niya ang Iloilo ug Sibuyan Island sa Romblon. Apan wa gihpon siyang kalikay sa dugang mga pagsaway:
· Wa siya moduaw sa amihanang Sugbo nga maoy labing nagusbat sa bagyo;
· Wa molibot sa Sibuyan nga gisantako sab sa bagyo kay igo rang nilili sa nalunod nga MV Princess of the Stars; ug
· Wa mogawas sa airport sa Iloilo bisan aron na lang unta sa paglili sa pipila sa gibahaan nga 42 ka lungsod ug sa makaluluoyng kahimtang sa mga biktima.
-o0o-
Hangtod karon, wa pa gihapon matarung pagtubag sa Malakanyang ang lehitimong mga pangutana unsa ba gyod kamapuslanon ang pagduaw ni Arroyo sa Estados Unidos bisan sa makalilisang nga kadaot nga nahiagoman sa nasud ug katawhan:
· Way dinaliang panginahanglan sa pagduaw kay way dagkong hulga ni kalamboan sa relasyon tali sa duha ka nasud ug pulos naglutaw nga mga pagarpar ray naluwatan mahitungod sa gubatok sa terorismo, sa pagpalambo sa suplay sa pagkaon ug pagpadali sa mga benepisyo sa Pilipinhong mga beterano sa ikaduhang gubat; ug
· Wa nay kapuslanan ang bisan unsang kauyonan tali nilang US Pres. George Bush ug Arroyo kay lameduck na si Bush, gikasilagan sa kinabag-an sa mga Amerikanhon tungod sa nasaag niyang gubat sa Iraq ug di na tuohan sa mga sakop sa US Congress, kay pulihan na sa Enero sa modaog sa eleksiyong presidensiyal karong Nobyembre.
-o0o-
May sukaranan ang pagduda nga ang tinuod nga tumong ni Arroyo pagpamugos sa pagduaw sa US, tinalikdan ang nag-antos niyang katawhan, mao ang pagpanalipod sa iyang kaugmaon, kon mokanaog na sa Malakanyang sa 2010. Kay gawas ni Bush, nisuway sab pakigtagbo sa posibleng mga mopuli sa White House—si Barack Obama sa Democratic Party ug John McCain sa Republican Party.
Apan ang nakigtagbo niya mao ra si McCain, nga nangiwit ni Obama sa surveys. Si Obama, nga paboritong mamahimong labing unang itom nga pangu sa US, wa kahigayon pakigkita niya.
-o0o-
Isip mat-an pa sa pinya nga tinun-an sa kasaysayan, nahibawo si Arroyo nga higala lang siya sa US kon kapuslan pa. Ug nga mous-os pag-ayong iyang kapuslanan kon mawa na sa gahom duha ka tuig gikan karon. Maong namuhun-puhon nang daan. Nagpaila nang daan nilang McCain ug Obama aron di makalimtan kon apikihon sa mopuli niya sa Malakanyang.
Ang daotang balita alang ni Arroyo: Bisan itoy pa niya ang mobanos sa palasyo, di na niya mahimong kapugngan hangtod sa hangtod ang pag-abot sa dugay nang nalangay nga adlaw sa panudya. [30] leo_lastimosa@abs-cbn.com
No comments:
Post a Comment