ILAD SA EDUKASYON
Nasukamod ang pasalig ni Pres. Arroyo nga kon mapadayon ang kausaban sa ekonomikanhong mga lagda nga iyang nasugdan, nga naglakip sa pagpahamtang sa expanded value added tax (Evat), mahingpit na gyod ang pagkahimo sa Pilipinas nga first world country. Atubangan sa lapad nga katimawa nga nihakop ron sa kinabag-an sa katawhan, nihagsa ang iyang pag-insistir nga ang Evat nakapanalipod sa nasud ug sa katawhan gikan sa labing grabeng epekto sa kalibotanong krisis sa lana ug pagkaon.
Ang pait nga kahimtang sa katawhan maoy labing tataw nga ebidensiya nga si Arroyo nahimutang sa laing kalibotan. Nga ang iyang nakit-an nga "enchanted kingdom" di mao ang sulad nga nahimong pinuy-anan sa iyang katawhan.
-o0o-
Labing uwahing kasayuran nga nakagusbat sa pangangkon ni Arroyo wa magikan sa iyang politikanhong mga kaatbang, ni sa mga sakop sa media nga wa pa mapalit sa iyang pamunoan, kon dili gikan sa iyang kaugalingong tugkaran—gikan sa usa sa mga ahensiya ubos sa iyang kaugalingong buhatan: Ang National Statistical Coordinatin Board (NSCB) nisukwahi sa iyang pangangkon nga nilambo na pag-ayong sistema sa edukasyon.
Gani, ang NSCB nideklarar na nga mahimong mapakyas ang pamunoang Arroyo pagtuman sa tinguha pagpa-eskuyla sa tanan sa tuig 2015. Labing makadaot nga bahin sa taho sa NSCB mao nga nahitabo ang pagtidlom atol sa pamunoang Arroyo. 90% ang naka-eskuyla sa elementary lima ka tuig ang nilabay. Apan nitidlom ni ngadto sa 83% sa niaging tuig. Mas makapasubo ang pagtidlom sa mga tinun-an sa high school: Upat sa matag 10 ka tinun-an ang wa katungha tungod sa kakabos.
-o0o-
Nakakita ang katawhan giunsa pagsulbad ni Arroyo ang nitumaw nga mga suliran sa edukasyon. Ang kakuwang sa classrooms gisulbad pinaagi sa pagdugang sa mga tinun-an sa matag classroom. Dihang kuwang lang gihapon, gi-doble ug gi-triple ang mga klase sa matag classroom. Ug dihang gibisto sa DepEd ang binuang, gitangtang niya ang matinud-anong education secretary.
Nahadlok kong pagtabon lang gihapon inay pagsulbad ang himuon ni Arroyo. Nga inay aksiyonan ang ilang findings, sabonan lang hinuon ang kadagkoan sa NSCB. Nga inay tabangan ang kabos nga mga tinun-an pag-eskuyla, lipat-lipaton lang gihapon ang ilang mga ginikanan.
-o0o-
Nga way kalainan sa nahaunang mga hinabang nga iyang gitanyag alang sa mga tinun-an: Gihatagan og tagsa ka kilong NFA rice ang matag tinun-an sa day care centers ug Grade 1 sa public schools. Nahunong ang proyekto bisan wa pa matiwas pagpatuman. Apan nabantang ang tumang kabinuang.
Kay ang proyekto nanukad sa binuang nga pagtuo nga mga tinun-an ra sa day care centers ug Grade 1 ang gipanggutom. Nga ang mga tinun-an sa Grade 2 hangtod sa Grade 6, bisan kon mas gigutom, di angayng apilon pagtabang. Ug nga ang tabanganan mao rang mga nagtungha, bahala nang wa ka-eskuyla kay mas timawa. [30] leo_lastimosa@abs-cbn.com
No comments:
Post a Comment