TABANG SA NORTE
Turno na sab sa Kapisanan ng mga Brodkaster ng Pilipinas (KBP) ang pag-apud-apod og mga hinabang alang sa mga biktima sa bagyong Frank sa amihanang Sugbo. Ang gatosan ka mga biktima sa Medellin ug Bogo City ang nakadawat sa mga hinabang nga natigom atol sa "Radyo-Thon" nga gisalmotan sa mga sibyaanan nga sakop sa KBP sa Sugbo, Bohol ug Negros Oriental sa niaging buwan.
Apil sa nahatagan sa mga hinabang mao ang 367 ka mga pamilya nga nawad-an og mga pinuy-anan sa Medellin ug 82 ka mga pamilya nga nawad-an og mga bay sa Bogo. Matag pamilya nakadawat og putos nga may tulo ka kilong bugas humay, tulo ka latang sardinas ug lima ka putos nga noodles ug tagsa ka sakong used clothing.
-o0o-
Nangu sa pag-apud-apod sa mga hinabang sa Medellin Sports Complex mao silang Carlo Dugaduga sa Aksyon Radyo, ang executive vice chairman sa KBP Cebu Chapter; Eulogio Jimenes sa IBC 13, vice chairman alang sa TV; Max Andrino sa RPN 9, secretary; Manny Galicia sa Home Radio, auditor; ug Bong Soriano sa DYHP-RMN. Giabagan sila nilang Medellin Vice Mayor Micmic Miranda ug Planning and Development Officer Giles Villamor.
Nangu sab sa pag-apud-apod sa hinabang sa Bogo City Hall mao silang Tata Cinco-Sy, Area Manager sa ABS-CBN Central Visayas, ug Bogo City Mayor Celestino Martinez Jr. Inabagan nilang Tony Avila sa DYCM, Rico Lucena sa TV Patrol Central Visayas ug mga opisyal sa Bogo.
-o0o-
Ang sunod nga makadawat sa mga hinabang pinaagi sa KBP Cebu Chapter mao ang mga biktima sa bagyo sa Daanbantayan ug San Remegio. Karong Sabado matabangan nang 630 ka mga pamilya ang nawad-an og mga panimay sa Daanbantayan; samtang 233 ka mga pamilya ang nawagtangan og mga pinuy-anan sa San Remegio.
Ang kinatibuk-ang kampanya gikan sa "Radyo-Thon" ngadto sa paghakot, pagpamutos ug pag-apud-apod sa relief goods maoy bunga sa pagbudlay di lang sa nagpakabanang mga magsisibya sa Sugbo ug sa mga boluntaryo gikan sa nagkalainlaing hut-ong sa katilingban ug pagtabang sa mga ahensiya sa kagamhanan ug sa pribadong sektor.
-o0o-
Human matabangan ang tanang nawagtangan og mga pinuy-anan sa pito ka lungsod sa amihanang Sugbo, tulo sa isla sa Bantayan (3,672 ka pamilya) ug upat sa mainland (1,321 ka pamilya), may sobra pang relief goods ang KBP Cebu Chapter ug ang ABS-CBN Cebu alang sa mga biktima sa bagyo sa mga lalawigan sa Kasadpang Kabisay-an nga mas nagrabehan sa katalagman.
Pagsugod sa among relief campaigns, way bisan usang nagtuo nga ingon ini kadaghan ang mga hinabang nga among matigom. Dihang naklaro ang kadaghan sa mga pamilyang naapektahan, gipakaingon namo kon mahugno lang ang mga biktima kay di sila maabtan sa among tabang. Salamat sa inyong tabang, maapod silang tanan ug makatabang pa ta sa atong mga silingan. [30] leo_lastimosa@abs-cbn.com
No comments:
Post a Comment