HAPIT NANG PANUDYA
Nitibugsok pag-ayong rating ni Pres. Arroyo bisan sa pinatuyangan niyang pagwaldas sa buhis sa katawhan alang sa bisan unsa na lang subsidy nga iyang nahunahunaan. Ang matag naapiki nga hut-ong iyang gitanyagan og tabang—gikan sa kabos nga mga tinun-an ngadto sa kabos nga mga drayber ug mga konsumidor sa kuryente—aron pagkumbinser nila nga nagdugo ang iyang kasingkasing alang sa mga kabos.
Apan, salamat sa lapad nilang katimawa, ang katawhan wa na magpailad. Nabantang nang tinuod nga bulok sa nagpatuong ilang kampeyon. Ang peste nga expanded value added tax (Evat) maoy nakapasamot sa kamahal sa lana, kuryente ug ubang inadlawng palaliton.
Ug di mahitabong papason ang Evat. Ang mas taas nga presyo nagpasabot nga mas dako ang makolektang Evat. Madanihon kaayong maong tentasyon aron palabyon sa pamunoan nga wa motago sa iyang kamahigugmaon sa kuwarta.
-o0o-
Ang alas ni Arroyo dihang natay-og ang iyang pamunoan sa Hello Garci ug ubang mga eskandalo mao nga mas takos siyang tagduma sa kagamhanan. Kay sa iyang mga kaatbang nga utro sang nangalisbo sa ilang kalambigitan sa nangaging kurakot nga mga pamunoan. Way pupanagana niyang giangkon ang kredito sa paglig-on sa peso ug paglambo sa nasudnong ekonomiya sa niaging tuig.
Nahugno ang tanan niyang panghambog sa pag-ulbo sa krisis sa lana ug pagkaon karong tuiga. Ang iyang panghunaw og responsibilidad ug pagpasa nga mugna sa kalibotanong merkado ang krisis igo lang nakabisto sa laing eskandalo: Nga nilig-on ang peso sa niaging tuig di tungod niya kon dili tungod kay nihuyang ang dolyar ug nga nilambo ang ekonomiya tungod sa abundang dollar remittances sa iya lang gipasagdan nga OFWs.
-o0o-
Kalisod ug kagutom sa kinabag-an sa katawhan maoy nakatukmod nila pag-atubang sa pait nga kamatuoran: Nga ang pangu nga ilang gitugotang magpabilin sa gahom bisan sa mga pasangil sa pagpanikas sa piniliay ug pagpangawkaw sa nasudnong katigayonan tungod ug alang sa gisaad nga kalinaw ug kalamboan napakyas pagtuman sa tanan niyang pasalig.
Inanay nilang naamgohan nga tinuod ang pasidaan sa pipila ka nagpakabana nga hut-ong: Nga ang kakuwang o ka-wa gyoy mandato sa pamunoan maoy motino sa iyang kapakyasan. Unsaon man tuod nimo pag-alagad ang katawhan kansang kabubut-on imong gitikas ug gikawat?
-o0o-
Wa nay kapaingnan si Arroyo. Gisalikway siya sa tanang bahin sa nasud. Bisan ang Kabisay-an nga giuran-uran niya pag-angkon nga iyang teritoryo wa na matagbaw sa iyang pamunoan. Ubos na kaayong pagtan-aw sa katawhan ni Arroyo nga magduda na sila kon modeklarar siya sa SONA nga mosidlak ang adlaw sa silangan.
Ang bag-ong gimik sa Malakanyang pag-usab sa konstitusyon aron mahingpit ang kauyonan sa kalinaw uban sa MILF di kaugpo. Ang bisan unsang maniobra paglugway sa termino ni Arroyo tinong isalikway sa kinabag-an ubang nagdilaab nga kasilag. [30] leo_lastimosa@abs-cbn.com
No comments:
Post a Comment