NAHIBAT SA EVAT
Bisan giunsa og pamostura sa Malakanyang, di nang kalikay si Pres. Arroyo sa responsibilidad sa paspas ug way kinutobang pagburot sa presyo sa lana. Ang tanang lakang nga gipasiugdahan ni Arroyo—nga gidominahan sa subsidy sa mga presyo ug mga bayranan nga nisaka—napamatud-an nga pulos taphaw. Pulos napakyas paghaw-as sa katawhan gikan sa lawom nga katimawa nga ilang nahimutangan.
Maong samtang nagpadayon pagsaka ang presyo sa lana matag semana, ang katawhan inanayng nakatultol diin gikan ang ilang pag-antos. Ug inanayng nitumaw ang dakong eskandalo: Si Arroyo nga nagpatuong may kasingkasing nga nagdugo alang sa labing kabos sa katawhan mao diay ang tinuod nga responsable sa pagpabug-at sa ilang palas-unon.
-o0o-
Ang pagpahamtang sa Evat sugod niadtong 2006 nakaapiki sa kinabag-an sa katawhan. Apan nakalusot tungod sa pangilaba nilang Arroyo ug sa iyang mga alyado nga ang Evat ray makaluwas sa kagamhanan gikan sa pagka bangkarota. Ang kasuko sa katawhan sa Evat naklaro hinuon dihang ilang gisalikway ang kinabag-an sa mga kandidato pagka senador sa administrasyon sa niaging tuig, apil na sa inila-unta-kaayo-apan-unsaon-ta-man-nga-mao-may-nangamahan-sa-Evat nga si Ralph Recto.
Aron pagpahilom sa sibaw nga mga protesta batok sa Evat, gipasalig ni Arroyo nga ang P4 bilyones nga natigom sa Evat maoy gamiton pagpatuman sa iyang mga programa alang sa mga kabos. Ang wa isulti ni Arroyo mao nga niabot nag P7.4 bilyones ang kita sa Evat sa niaging kapin sa duha ka tuig.
-o0o-
Ang labing dakong atraso sa Evat mao nga nahimo ning kahimanan pagsamot pagduot sa katawhan. Sukwahi sa pagarpar sa palasyo nga naningkamot sila pagpagaan sa epekto sa krisis. Magkataas ang presyo sa mga palaliton, mas taas sab ang buhis nga ipahamtang.
Himuon natong pananglitan ang presyo sa lana. Niadtong P30 pa ang litro sa krudo, P3.60 ra ang Evat; apan karong P58 na ang krudo, P6.96 nang Evat. Unsa kaitom sa kasingkasing sa mga tagduma sa kagamhanan nga makaako pagtampok sa bukubuko sa katawhan sa ingon ining paagi?
-o0o-
Sayop ang pasidaan ni Finance Secretary Margarito Teves nga ang paglibkas sa Evat sa lana makapahunong sa mga programa alang sa mga kabos. Gawas nga pulos ulug-ulog ang mga programa, kon libkason ang Evat sa lana, ang kaayuhan nga makuha sa katawhan mas dako pa.
Bisan unsaon paghinuktok sa Malakanyang unsa pay subsidy nga ikahatag, di nila malabwan ang epekto sa paglibkas sa Evat: P6 nga us-os sa presyo sa matag litro sa tanang produkto sa lana. Di lang alang sa pipila kon dili sa tanan gyong konsumidor.
Ug inay motutok sa P20 bilyones nga mawa sa panudlanan, angayng lantawon sa palasyo ang mas dakong kita kon ang samang P20 bilyones gastuhon sa mga konsumidor alang sa ubang mga produkto nga, nakatag-an mo, may Evat sab. [30] leo_lastimosa@abs-cbn.com
No comments:
Post a Comment